सर्वाधिक गर्दीच्या ठाणे रेल्वे स्थानकाचा लवकरच चेहरामोहरा बदलणार!

दिनमान प्रतिनिधी

ठाणे।

ठाणे रेल्वे स्थानकातील गर्दी कमी होण्याबरोबरच प्रवाशांना अद्ययावत सेवासुविधा उपलब्ध व्हाव्यात, या दृष्टिकोनातून हाती घेण्यात येणार्‍या कामात ठाणे महापालिकेचा महत्त्वाचा सहभाग असणार आहे. रेल्वे स्थानक परिसरातील प्रवाशांची ये-जा सुलभ होईल व वाहतूक जलदगतीने होण्यासाठी उपाययोजना कराव्यात, अशा सूचना महापालिका आयुक्त अभिजित बांंगर यांनी केल्या आहेत. रेल्वे प्रशासनातर्फे ठाणे रेल्वे स्थानकाच्या आधुनिकीकरणाचे काम हाती घेण्यात येणार आहे. यासंदर्भात दिशा ठरविण्यासाठी रेल्वे अधिकारी व बांगर यांची संयुक्त बैठक नुकतीच पार पडली.

या वेळी रेल्वे प्रशासनातर्फे मुख्य प्रकल्प अधिकारी मिश्रा, महापालिकेचे प्रकल्प अधिकारी प्रवीण पापळकर आदी उपस्थित होते.

रेल्वे काय करणार?

ठाणे रेल्वे स्थानक सर्वाधिक गर्दीचे आहे. उपनगरीय गाड्यांसह लांब पल्ल्याच्या गाड्याही येथे मोठ्या प्रमाणावर थांबत असल्याने दैनंदिन सुमारे 6.5 लाख प्रवासी प्रवास करतात. सध्या एक हजाराहून अधिक गाड्यांची ये-जा आहे.

त्यामुळे सद्यःस्थितीत 11 फलाटांवर पूर्व-पश्चिम जोडणारा भव्य डेक तयार करण्यात येणार आहे. या डेकमुळे प्रवाशांची गर्दी कमी होण्याबरोबर सुरक्षितताही राखली जाणार आहे. या डेकवर प्रवाशांसाठी आवश्यक प्रतीक्षागृह, तिकीटघर, शौचालय आदी सेवासुविधा उपलब्ध असणार आहेत. हा डेक ठाणे पश्चिम व पूर्वेकडील सॅटिस प्रकल्पाला जोडला जाईल. तसेच रेल्वेच्या अखत्यारितील बाहेरील बाजूकडील जागेत दुचाकी व चारचाकी वाहनांसाठी बहुमजली पार्किंग प्लाझा, तीन ते चार व्यावसायिक इमारतींचे बांधकाम रेल्वेमार्फत करण्यात येणार आहे.

देशातील पहिली रेल्वे बोरीबंदर ते ठाणेदरम्यान 1850 मध्ये धावली. कोळशावर धावलेल्या रेल्वेची प्रतिकृती, त्याचा संपूर्ण इतिहास नागरिकांना माहिती व्हावा, अशा स्वरूपाचे वस्तुसंग्रहालय उभारण्यात येईल.

रेल्वे स्टेशनमधून पूर्वेला 30 टक्के तर पश्चिमेला 70 टक्के प्रवासी बाहेर पडतात. ठाणे पश्चिमेला गोखले रोड व शिवाजी पथ या मार्गावर मोठ्या प्रमाणावर नागरिकांची गर्दी होते. ही गर्दी टाळण्यासाठी हा परिसर फेरीवालामुक्त करणे तसेच पार्किंगच्या अतिरिक्त सुविधा उपलब्ध करून देणे, पादचार्‍यांसाठी रस्थानकाबाहेर चालण्यासाठी मोठी जागा उपलब्ध होऊन परिसरातील वाहतूककोंडी कमी होण्यास मदत होईल या दृष्टीने करावे, असे बांगर यांनी या वेळी नमूद केले.

सद्यःस्थितीत ठाणे पूर्व येथे सॅटिसचे काम सुरू असल्यामुळे प्रवाशांचा अतिरिक्त ताण हा पश्चिमेकडील बाजूस येत आहे. ठाणे पूर्व येथील पुलाचे काम अंतिम टप्प्यात असून, येत्या 8 ते 10 महिन्यांत या पुलाचे काम पूर्ण होईल. त्याचबरोबर पूर्वेला बस टर्मिनसचा प्रस्ताव आहे. त्यानुसार पूल व बस टर्मिनस पूर्ण झाल्यावर पूर्वेकडील वाहतूकही सुरळीत होण्यास मदत होणार आहे.

– अभिजित बांगर, आयुक्त, ठाणे महापालिका