दिनमान प्रतिनिधी
ठाणे|
ठाणे शहर पोलिसांनी संपूर्ण आयुक्तालयाच्या कार्यक्षेत्रात शुक्रवारी रात्री ११ ते शनिवारी पहाटे ५ या सहा तासांत ऑपरेशन ऑल आऊट मिशन राबविले. यात २३९ पोलिस अधिकारी आणि १,१८८ अंमलदारांनी सहभाग घेतला. यामध्ये ६०० पेक्षा अधिक जणांवर कारवाई केल्याची माहिती एका वरिष्ठ पोलिस अधिकार्‍याने दिली.
पोलिस आयुक्त जयजित सिंग आणि सहपोलिस आयुक्त दत्तात्रय कराळे यांच्या आदेशाने ठाणे, भिवंडी, कल्याण, उल्हासनगर आणि वागळे इस्टेट या पाचही परिमंडळांमध्ये राबविलेल्या ऑपरेशन ऑल आऊट या मोहिमेत स्थानिक पोलिसांसह गुन्हे अन्वेषण विभागाची विविध पथके सहभागी झाली होती. गुन्हे अन्वेषण विभागाचे अतिरिक्त पोलिस आयुक्त डॉ. पंजाब उगले, पश्चिम प्रादेशिक विभागाचे अतिरिक्त पोलिस आयुक्त डॉ. महेश पाटील, पूर्व प्रादेशिक विभागाचे अतिरिक्त आयुक्त दत्तात्रय शिंदे तसेच ठाण्याचे उपायुक्त गणेश गावडे, भिवंडीचे उपायुक्त नवनाथ ढवळे, कल्याणचे एस. बी. गुंजाळ, उल्हासनगरचे उपायुक्त डॉ. सुधाकर पाठारे, वागळे इस्टेटचे अमरसिंह जाधव आणि वाहतूक शाखेचे उपायुक्त डॉ. विनय राठोड आदींच्या मार्गदर्शनाखाली ऑल आऊट मोहीम राबविण्यात आली.
वाहतुकीचे नियम मोडणार्‍या १९० वाहनचालकांवर मोटर वाहन कायद्यानुसार कारवाई करण्यात आली. त्यांच्याकडून एक लाख ४८ हजार रुपयांचा दंड वसूल केल्याची माहिती वाहतूक शाखेने दिली.
यामध्ये शस्त्र बाळगणार्‍या नऊ, जुगार खेळणार्‍या दहा, अंमली पदार्थ बाळगणाजया दोन, भरघाव वेगाने वाहने चालविणार्‍या ३४ जणांवर कारवाई झाली. अंमली पदार्थांचे सेवन करणार्‍या ७१ आणि तंबाखूजन्य पदार्थांचे सार्वजनिक ठिकाणी सेवन करणार्‍या २२२ जणांवरही गुन्हे दाखल करण्यात आले. गंभीर गुन्ह्यांमध्ये पसार झालेल्या आठ आरोपींना अटक करण्यात आली. तर आयुक्तालयाच्या परिसरातील २३३ लॉजेसमध्येही तपासणी करण्यात आली. या कारवाई दरम्यान महत्वाच्या ४४ ठिकाणी नाकाबंदी केली होती. सहा तासांच्या या कारवाई दरम्यान गुन्हेगार आणि बेकायदा धंदे करणाजयांमध्ये मात्र चांगलेच धास्तीचे वातावरण निर्माण झाले होते.
