कोरोना आकडेवारीवरून तणातणी

केरळ सरकार कोरोना रुग्णांची दैनंदिन माहिती केंद्राला देत नसल्याचे वृत्त केरळने मंगळवारी फेटाळले. हे आरोप खोटे असून, राष्ट्रीय स्तरावर यासंदर्भात चाललेला अपप्रचार निषेधार्ह असल्याची टीका केरळच्या आरोग्य मंत्री वीणा जॉर्ज यांनी केली. केरळ सरकार रुग्णांच्या आकडेवारीची माहिती दर पाच दिवसांनी देते. त्यामुळे नव्या कोरोना रुग्णांची संख्या, मृत्यू आणि संक्रमण दराविषयीच्या भारताच्या कोरोना साथविषयक मुख्य निरीक्षण निर्देशांकावर परिणाम होत आहे. त्यामुळे केंद्राने केरळ सरकारला दैनंदिन अद्ययावत आकडेवारी देण्यास सांगितले आहे. मात्र यासंदर्भात आरोग्यमंत्री जॉर्ज यांनी सांगितले, की केरळने दररोज कोरोनाविषयक आकडेवारी केंद्राला विहित स्वरूपात कळवली आहे. त्यात आतापर्यंत कुठलाही खंड पडलेला नाही.