मशिदीच्या डागडुजीवेळी मंदिराचे अवशेष सापडले

कर्नाटकमधील मंगळुरू येथील एका मशिदीच्या डागडुजीच्या कामाकाजाच्या वेळी मशिदीखाली हिंदू मंदिरसदृश्य असे काही अवशेष सापडले आहेत. मंगळुरूपासून काही अंतरावर असणार्‍या या मशिदीखाली मंदिराचे अवशेष सापडल्याची बातमी वार्‍यासारखी पसरली असून, हा सारा प्रकार समोर आल्याची माहिती एएनआय या वृत्तसंस्थेने दिली आहे. मिलाली येथील जुमा मशिदीच्या डागडुजीचं काम सुरू आहे. यानिमित्त सुरू असणार्‍या खोदकामादरम्यान हे अवशेष सापडले आहेत. मशिदीचं व्यवस्थापन पाहणार्‍या समितीच्या पुढाकारानेच हे काम केलं जात होतं. हे अवशेष सापडल्यामुळे आता पूर्वी या ठिकाणी हिंदू मंदिर होते, असा दावा केला जात आहे. विश्व हिंदू परिषदेच्या (व्हीएचपी) नेत्यांनी जिल्हा प्रशासनाकडे यासंदर्भात धाव घेतली असून, कागदोपत्री सत्यता पडताळून पाहिल्याशिवाय या ठिकाणचे काम थांबवण्यात यावं, अशी मागणी विश्व हिंदू परिषदेने केली आहे. दरम्यान, दक्षिण कानडा जिल्ह्याच्या आयुक्तांनी या अवशेषांची काळजी घेण्याचे आणि ते आहे तसेच जतन करण्याचे आदेश दिले. प्रशासनाने तातडीने या जमिनीसंदर्भातील कागदोपत्री पडताळणी सुरू केली असून लोकांना संयम बाळगण्याचं आवाहन केले आहे. मला त्या ठिकाणी काम करीत असणार्‍या अधिकार्‍यांकडून आणि पोलिसांकडून यासंदर्भात माहिती मिळाली. या जमिनीची मालकी कोणाकडे होती आणि ती कशी हस्तांतरित होत आली याची पाहणी सध्या जिल्हा प्रशासन करीत आहे. आम्ही दोन्ही खात्यांकडून म्हणजेच जमिनीची नोंद ठेवणारा विभाग आणि वफ्फ बोर्डाकडून माहिती घेणार आहोत, असे दक्षिण कानडाचे उपायुक्त राजेंद्र के. व्ही. यांनी सांगितले. सध्या केल्या जाणार्‍या दाव्यांची पडताळणी करून आम्ही यासंदर्भातील निर्णय लवकरच घेऊ. तोपर्यंत आम्ही या अवशेषांची काळजी घेण्याचे निर्देश दिले असून, लोकांनी कोणताही अर्थ यामधून काढू नये, असे आवाहन करतो. लोकांनी कायदा आणि सुव्यवस्थेचं पालन करावं, असं अधिकार्‍यांनी म्हटले आहे.