दिनमान प्रतिनिधी
ठाणे। ठाणे महापालिकेच्या दादोजी कोंडदेव स्टेडियमवर सुमारे 25 वर्षांनंतर पाहिल्यांदाच विजय हजारे रणजी क्रिकेट सामन्यांचा थरार ठाणेकरांसह समस्त क्रीडा रसिकांना अनुभवता येणार आहे.
बुधवार 8 डिसेंबर 2021 पासून रणजी सामने सुरू होत असून संपूर्ण स्टेडियम लढतींसाठी सज्ज असल्याची माहिती राज्याचे नगरविकास मंत्री तथा ठाणे जिल्ह्याचे पालकमंत्री एकनाथ शिंदे यांनी दिली. ठाणेकरांसाठी ही अभियानाची गोष्ट असल्याचेही पालकमंत्री शिंदे यांनी विजय हजारे रणजी ट्रॉफीसंदर्भात आयोजित पत्रकार परिषदेत नमूद केले.
यावेळी पत्रकार परिषदेत पालकमंत्री एकनाथ शिंदे यांनी हिंदुहृदयसम्राट बाळासाहेब ठाकरे व धर्मवीर आनंद दिघे यांच्या आठवणींना उजाळा दिला. दादोजी कोंडदेव स्टेडियमवर खेळपट्टी तयार करण्यासाठी पालकमंत्री एकनाथ शिंदे यांच्या मार्गदर्शनाखाली महापालिकेचे सर्व पदाधिकारी तसेच प्रशासनाने विशेष मेहनत घेवून नामवंत क्युरेटर नदिम मेमन यांच्या देखरेखीखाली आंतरराष्ट्रीय दर्जाची खेळपट्टी तयार करण्यात आली आहे.
ठाणे शहराचा विकास वेगाने होत असला तरी खेळाडूंना प्रोत्साहन देण्यासाठी महापालिका प्रशासन सदैव तत्पर असून विविध स्पर्धेचे यशस्वी आयोजन क्रीडा विभागातर्फे करण्यात येत आहे. अनेक खेळाडू या स्टेडियमवर येऊ न गेले असून त्या सवार्र्नी या खेळपट्टीचे कौतुक केल्याचेही पालकमंत्री शिंदे यांनी यावेळी नमूद केले.
दादोजी कोंडदेव स्टेडियमवर रणजी सामान्यांसाठी महापालिकेच्या क्रीडा विभागाकडून दादोजी कोंडदेव स्टेडियममध्ये खेळपट्टी, सीमारेषा, प्रेक्षागृह तसेच इतर आवश्यक ती सर्व कामे पूर्ण करण्यात आली आहेत. या पत्रकार परिषदेला महापौर नरेश म्हस्के, मुंबई क्रिकेट प्रीमियर लीग गव्हर्रनिंग कौन्सिलचे चेअरमन मिलिंद नार्वेकर, उपमहापौर पल्लवी कदम, सभागृह नेते अशोक वैती, महापालिका आयुक्त डॉ. विपिन शर्मा, क्रीडा व सांस्कृतिक कार्य समिती सभापती प्रियांका पाटील, नगरसेवक विकास रेपाळे, अतिरिक्त आयुक्त (1) संदीप माळवी, अतिरिक्त आयुक्त (2) संजय हेरवाडे, नामवंत क्युरेटर नदिम मेमन, उपायुक्त मनीष जोशी, क्रीडा अधिकारी मीनल पालांडे आदी उपस्थित होते.
पाच सामने
यंदा विजय हजारे ट्रॉफीचे पाच सामने दादोजी कोंडदेव स्टेडियमवर होतील. गेले दोन दिवस या स्पर्धेतील सहभागी संघांचे सराव सत्र स्टेडियमवर झाले. 8, 9, 11, 12 आणि 14 डिसेंबर रोजी प्रत्यक्ष सामने होणार आहेत.
दादोजी कोंडदेव स्टेडियमवर यापुढे आंतरराष्ट्रीय सामने खेळविण्यासाठी व डे-नाईट सामन्याच्या दृष्टीने स्टेडियमच्या अत्याधुनिक करण्यासाठी लागणार्‍या बाबींसाठी नगरविकास विभागातर्फे सर्वोतोपरी मदत केली जाईल.
– एकनाथ शिंदे, नगरविकासमंत्री
प्रशासनाने विशेष मेहनत घेवून नामवंत क्युरेटर नदिम मेमन यांच्या देखरेखीखाली आंतरराष्ट्रीय दर्जाची खेळपट्टी तयार केली आहे. या मैदानावर रणजी क्रिकेट सामने होत असून ही आनंदाची बाब आहे. भविष्यात याठिकाणी आयपीएल तसेच इतर विविध सामने खेळविले जातील, यासाठी विशेष प्रयत्न करू.
– नरेश म्हस्के, महापौर, ठाणे
तब्बल 25 वर्षांनंतर दादोजी कोंडदेव स्टेडियमवर हे सामने होत असून ही अभिमानाची गोष्ट आहे. बीसीसीआयच्या नियमावलीनुसार काही काळ क्रिकेट सामने बंद होते. परंतु सन 2018 मैदानावरील स्थानिक कार्यक्रम बंद केले. आता या मैदानावर सामने होत आहे.
– डॉ. विपिन शर्मा, आयुक्त, ठाणे महापालिका
