दिनमान प्रतिनिधी
ठाणे।
ठाणे महापालिका व महाराष्ट्र शासन प्रदूषण मंडळ यांनी संयुक्तरीत्या सिंगल युज प्लॅस्टिक कॅरीबॅग बंदीबाबत मोहीम हाती घेतली होती.
या मोहिमेंतर्गत नुकतीच कोपरी, उथळसर व खोपट परिसरात प्लास्टिक कॅरीबॅग बंदी कारवाई अंतर्गत शहरातील दुकानांमधील 47 किलो प्लास्टिक कॅरीबॅग जप्त करून 15 हजार रुपये दंड वसूल करण्यात आला. ठाणे महापालिका आयुक्त अभिजित बांगर यांनी दिलेल्या आदेशानुसार ही कारवाई करण्यात आली आहे.
केंद्र सरकारने महाराष्ट्र प्रदूषण नियंत्रण मंडळास सिंगल यूज प्लास्टिकबाबत कारवाई करण्याचे आदेश दिले असून, त्यानुसार महाराष्ट्र प्रदूषण नियंत्रण मंडळ आणि ठाणे महापालिकेने ही मोहीम हाती घेण्यात आली आहे. एकदा वापर करून टाकून देण्यात येणार्‍या प्लास्टिकमुळे पर्यावरणास हानी निर्माण होत आहे. यासाठी सिंगल यूज प्लास्टिकचा साठा करून विक्री करणार्‍या दुकानदारांवर तसेच सर्व आस्थापनांवर कारवाई करण्यात येत आहे. ही कारवाईची मोहीम ठाणे शहरात अधिक तीव्र स्वरूपात राबविली जाणार आहे.
सोमवारी सकाळपासूनच ठाणे पूर्वेतील कोपरी परिसर, स्टेशन रोड, कोपरी मार्केट परिसरातून सिंगल यूज प्लास्टिक बंदीच्या कारवाईस सुरुवात करण्यात आली.
या कारवाईअंतर्गत दुकानांमधून 35 किलो सिंगल यूज प्लास्टिक जप्त करण्यात आले असून, एकूण 10 हजार रुपये दंड वसूल करण्यात आला. तर मंगळवारी उथळसर प्रभाग समितीअंतर्गत केलेल्या कारवाईत उथळसर मार्केट आणि खोपट मार्केट परिसरातून 12 किलो प्लास्टिक कॅरी बॅग जप्त करून 5 हजार रुपये इतका दंड वसूल करण्यात आला आहे.
ही कारवाई ठाणे महापालिकेचे वैज्ञानिक अधिकारी ओम परळकर यांच्या मार्गदर्शनाखाली महानगरपालिकेच्या प्रदूषण नियंत्रण विभागाच्या कर्मचार्‍यांनी केली.
सिंगल यूज प्लास्टिकचा वापर टाळण्यासाठी नागरिकांमध्ये जनजागृती करण्यात येत असून, त्यानंतरही सिंगल यूज प्लास्टिकचा वापर करणार्‍यांवर 5 ते 25 हजारांची दंडात्मक कारवाई व कारावास अशा प्रकारची कारवाई होऊ शकते. यासाठी दुकानदारांनी व नागरिकांनी सिंगल यूज प्लास्टिकचा वापर टाळावा, असे आवाहन आयुक्त अभिजित बांगर यांनी केले आहे.
