दिनमान प्रतिनिधी
कल्याण ।
कल्याण पूर्व येथील चिंचपाडा परिसरात गुरुवारी एका संकुलात शिरलेल्या बिबट्याला 12 तासांच्या प्रयत्नांनंतर पकडण्यात वन विभाग, प्राणिमित्र संघटनांना यश आले. या बिबट्याने तीन नागरिक आणि एका वनसेवकाला जखमी केले आहे. हा बिबट्या भुकेलेला असल्याने आक्रमक होता. त्याला भुलीचे इंजेक्शन देऊन पकडणे शक्य झाल्याचे प्राणिमित्रांनी सांंगितले. दरम्यान, या बिबट्याला उपचारासाठी संजय गांधी राष्ट्रीय उद्यानात नेण्यात आले आहे.
चिंचपाडा भागातील श्रीराम अनुग्रह रहिवास इमारतीत गुरुवारी सकाळी 6 वाजता एक बिबट्या शिरला होता. मलंग गडाच्या जंगलातून इमारतीमध्ये शिरताना बिबट्याने दोन पादचार्‍यांवर हल्ला केला. त्यानंतर श्रीराम अनुग्रह संकुलात शिरताना इमारतीतील एका रहिवाशावर हल्ला केला होता. रहिवाशाने आरडाओरड करीत बिबट्याच्या तावडीतून सुटका करीत घरात पळ काढला. तात्काळ दरवाजा बंद केल्याने ते बचावले. यानंतर इमारतीतील रहिवाशांना घराबाहेर न पडण्याबाबत सतर्क केले तसेच वन विभागाच्या अधिकार्‍यांशी संपर्क साधला. बिबट्या शिरल्याची माहिती मिळताच वन विभागाच्या अधिकार्‍यांनी घटनास्थळी धाव घेत बिबट्याला पकडण्यासाठी प्रयत्न सुरू केले.
इमारतीचा चिंचोळा आवार आणि बघ्यांची झालेली गर्दी यामुळे बिबट्याला पकडण्यात अडचणी येत होत्या. बिबट्या इमारतीच्या आवारातच लपून बसल्याने इमारतीतील रहिवासी सकाळपासूनच दार बंद करून घरातच बसले होते. विभागीय वन अधिकारी संजय चन्ने आणि त्यांचे पथक घटनास्थळी दाखल झाल्यावर महापालिकेच्या अग्निशमन दलाचे जवान, पॉज, वॉर, सेवा, वफ या प्राणिमित्र संस्था, पोलिस यांनी श्रीराम अनुग्रह सोसायटीसह परिसराला वेढा घातला.
जखमी रहिवाशाला रुग्णालयात दाखल करण्यासाठी अग्निशमन दलाच्या जवानांनी इमारतीच्या गच्चीतून शिडीवरून खाली उतरविले. दरम्यान, बिबट्याला जेरबंद करताना एक वनसेवकही त्याच्या हल्ल्यात जखमी झाला.
स्थानिक वनाधिकार्‍यांना बिबट्याला जेरबंद करणे शक्य नसल्याने बोरीवली येथून संजय गांधी राष्ट्रीय उद्यानातील वन अधिकारी राजेश चन्ने आणि सहकारी यांच्या बिबट्या बचाव पथकाला दुपारी पाचारण करण्यात आले. या पथकातील नेमबाजांनी बिबट्यावर भुलीची इंजेक्शन्स सोडली. दोन इंजेक्शनच्यावेळी गुरगुरणारा बिबट्या तिसर्‍या इंजेक्शनमध्ये गारद झाला. त्याला तात्काळ जाळ्यात पकडून वैद्यकीय उपचारासाठी संजय गांधी उद्यानात नेण्यात आले. तो भुकेलेला असल्याने अधिक आक्रमक होता, असे ‘पॉज’चे नीलेश भणगे यांनी सांगितले. माळशेज घाट, बारवी धरण जंगल परिसरातून बिबट्या मलंगगड जंगलात आला असावा. तेथून तो भक्षाचा शोध घेत कल्याण पूर्वेत आला असावा. मागील आठ महिन्यांपासून बिबट्याचा ठाणे जिल्ह्याच्या मुरबाड, बदलापूर, उल्हासनगर, शहापूर, भिवंडी, पडघा, कसारा भागात संचार सुरू आहे.
