दिनमान प्रतिनिधी
उल्हासनगर|
कुटुंबाच्या निर्वाहासाठी घेतलेल्या तब्बल ४० टक्के व्याजाच्या तगाद्याला वैतागून एका इसमाने सोशल मीडियावर व्हिडीओ व्हायरल करून २४ जानेवारी रोजी आत्महत्या केली. या प्रकरणी कल्याण लोहमार्ग पोलिस ठाण्यात आकस्मिक मृत्यूची नोंद करण्यात आली असून, वृद्ध वडिलांनी पठाणी व्याजखोरावर कारवाई करण्याची मागणी केली आहे. मृत इसमाच्या पश्चात पत्नी, दोन लहान मुले, वृद्ध आईवडील आहेत.
उल्हासनगर कॅम्प नं. ५ परिसरात राहणारा गिरीश चुग हा पत्नी, दोन लहान मुले आणि वृद्ध आईवडीलांसोबत राहत होता. परिसरातील एका गारमेंट दुकानात कामाला असलेल्या गिरीशच्या सहकारी दोन मित्रांनी चुगली केल्याने त्याला दोन महिन्यांपूर्वी गारमेंट दुकानमालकाने कामावरून काढले होते. हाताला काम नसल्याने कुटुंबाच्या निर्वाहासाठी त्याने काही जणांकडून दरमहा ४० टक्के व्याजाने १ लाख रुपये उसने घेतले. मात्र ४० टक्के दरमहा व्याज देऊ न शकल्याने व्याजाच्या पैशासाठी तगादा सुरू झाला. व्याजाने पैसे देणार्यांनी थेट घरापर्यंत धाव घेतल्याने गिरीश चुग हादरून गेला होता. व्याजाचे पैशे देऊ शकत नसल्याने त्याने आत्महत्या करण्याचा टोकाचा निर्णय घेतला.
गिरीश याने २४ जानेवारी रोजी अंबरनाथ आणि बदलापूर रेल्वे स्थानकाच्या मधोमध रेल्वेरुळावर आत्महत्या करण्यापूर्वी एक व्हिडीओ सोशल मीडियावर व्हायरल केला. व्हिडीओमध्ये त्याने व्याजाच्या पैशाचा तगादा आणि चुगली करणार्या दोन मित्रांच्या त्रासाला कंटाळून आत्महत्या करतो असे म्हणत तेच आत्महत्येला जबाबदार असतील, असे सांगितले. ४० टक्के व्याजाच्या पैशासाठी तगादा लावणार्या दशरथ, रमेश सिंग, गोलू सिंग, गायकवाड, दुकानातील चुगली करणारे सहकारी जय, विनोद यांच्यावर कारवाई करण्याची विनंती गिरीश याने पोलिसांना केली. ३ आणि १ वर्षाच्या मुलाचा व वृद्ध आईवडिलांच्या सांभाळ करण्याची विनंती पत्नीला करून, मला माफ कर, असे व्हिडओमध्ये गिरीश म्हणाला. तसेच आत्महत्या करण्यास प्रवृत्त करणार्यांविरोधात तक्रार देऊन अद्दल घडण्यास त्याने पत्नीला सांगितले. या व्हिडीओने एकच खळबळ उडाली असून, पठाणी व्याजखोरावर कारवाई करण्याची मागणी नागरिकांकडून होत आहे.
वृद्ध वडिलांचा टाहो
एकुलता एक मुलगा असलेला गिरीश पत्नी, दोन लहान मुलांसह वृद्ध आईवडिलांचा सांभाळ करायचा. त्याच्या मृत्यूने आमचा सांभाळ कोण करणार, असा प्रश्न करून वडिलांनी टाहो फोडला. व्हिडीओमध्ये नाव घेतलेल्या इसमांवर कारवाई करण्याची मागणी वृद्ध वडिलांनी केली.
