दिनमान प्रतिनिधी
ठाणे। आपल्या महाराष्ट्राला गुरू आणि शिष्य परंपरेचा इतिहास आहे. सामाजिक-राजकीय क्षेत्रातही नेतेपदापर्यंत गेलेल्या प्रत्येकाने कुणाचे तरी शिष्यत्व पत्करले आहे. गुरूने दाखविलेल्या विचारांच्या वाटेवर शिष्याने यशस्वी प्रवास केला आहे. राजकीय क्षेत्रातील गुरू-शिष्याची आदर्शवत ठरावी अशीच एक जोडी या महाराष्ट्राने पाहिली आहे. ही जोडी म्हणजे शिवसेनाप्रमुख बाळासाहेब ठाकरे व धर्मवीर आनंद दिघे.
त्यांच्या आयुष्यात जे स्थान छत्रपती शिवाजी महाराज यांचे होते, जी भक्ती दुर्गामतेसाठी होती अगदी तशीच श्रद्धा बाळासाहेबांवर होती. त्यांच्या याच गुरुभक्तीचं दर्शन ‘धर्मवीर मुक्काम पोस्ट ठाणे’ या चित्रपटातही होणार आहे. तेच गुरुशिष्याचं नातं कथन करणारं गुरुपौर्णिमा हे गाणे प्रेक्षकांच्या भेटीस आले आहे. भिंतीवर छत्रपती शिवाजी महाराजांची मोठी तस्वीर, पुढ्यात खुर्चीवर बसलेले बाळासाहेब आणि त्यांच्या चरणी बसलेले आनंद दिघे आणि हा सर्व नजरा आपल्या भरल्या डोळ्यांत साठवणारे एकनाथ शिंदे असे सहजसुंदर दृश्य या गाण्यातून रेखाटण्यात आले आहे.
गुरुपौर्णिमा हा गुरूचा नाही तर शिष्याचा दिवस आहे, असे आनंद दिघे मानायचे. या दिवशी गुरूची सेवा केल्यास पदरात पुण्य पडते, अशी त्यांची श्रद्धा होती. आपल्या गुरूंचे चरणकमल धुण्याचा व पाद्यपूजा करण्याचा प्रसंग या गाण्यातून रेखाटण्यात आला आहे. आनंद दिघे यांची जी श्रद्धा बाळासाहेबांप्रति होती अगदी तशीच श्रद्धा आनंद दिघेंबद्दल ठेवणारे शिष्य म्हणजे एकनाथ शिंदे. त्यांच्या या गुरू- शिष्य नात्याची अनोखी गोष्ट या चित्रपटातून आणि या गाण्यातून उलगडणार आहे. संगीता बर्वे यांचे शब्द असलेल्या या गाण्याला संगीत आहे अविनाश-विश्वजीत यांचे, तर ते गायले आहे मनीष राजगिरे यांनी. धर्मवीर मुक्काम पोस्ट ठाणे चित्रपटात शिवसेनाप्रमुख बाळासाहेब ठाकरे यांची भूमिका मकरंद पाध्ये या अभिनेत्याने साकारली आहे. या गाण्यातून प्रथमच बाळासाहेबांच्या या महत्त्वपूर्ण व्यक्तीरेखेची झलक दिसते आहे. प्रसाद ओक, क्षितिश दाते यांच्याप्रमाणेच बाळासाहेब ठाकरे यांची व्यक्तीरेखा साकारणार्‍या मकरंद पाध्ये यांच्या लुकवरही रंगभूषाकार विद्याधर बट्टे यांनी घेतलेली मेहनत दिसून येते.
धर्मवीर आनंद दिघे यांनी निःस्वार्थीपणे, कोणताही लोभ न ठेवता केवळ आणि सर्वसामान्यांच्या भल्यासाठी आपले आयुष्य वेचले. यातून आनंद दिघे यांचा करारी बाणा तर दिसणारच आहे, पण त्यांच्या आत असलेला एक हळवा शिष्य, गुरूंपुढे आदराने नतमस्तक होणारा शिष्य, अशी त्यांची एक दुसरी बाजू प्रेक्षकांना गुरुपौर्णिमा या गाण्यातून बघायला मिळते आहे.
