दिनमान प्रतिनिधी
ठाणे।
शेवटच्या षटकापर्यंत रंगलेल्या सामन्यात ग्लोरिअस क्रिकेट क्लबने साईनाथ स्पोर्ट्स क्लबवर अवघ्या दोन धावांनी विजय मिळवत डॉ. राजेश मढवी स्पोर्ट्स फाउंडेशन आणि दैवज्ञ क्रिकेट क्लब आयोजित अर्जुन मढवी स्मृती महिला टी-20 लीग क्रिकेट स्पर्धेत विजयी सुरुवात केली. ग्लोरिअस क्रिकेट संघाने दिलेल्या 5 बाद 137 धावांचा पाठलाग करताना साईनाथ स्पोर्ट्स क्लबला 20 षटकांत 9 बाद 135 धावा करता आल्या.
सेंट्रल मैदानावर सुरू असलेल्या स्पर्धेतील सामन्यात ग्लोरिअस क्रिकेट क्लबने खराब सुरुवातीनंतर आयरा जाधवच्या नाबाद 68 धावांच्या खेळीमुळे शतकी धावसंख्या पार केली. आयराने तुफानी फलंदाजी करीत 41 चेंडूत आपले अर्धशतक पूर्ण केले होते. आपल्या नाबाद खेळीत आयराने 11 चौकार मारले. रिया साळुंखेने संघाच्या धावसंख्येत 46 धावांचे योगदान दिले. निधी घरतने दोन, सीआरा परेरा आणि अंशू पालने प्रत्येकी एक फलंदाज बाद केला. उत्तरादाखल साईनाथ स्पोर्ट्स क्लबच्या सारा सामंतने 39 चेंडूत 10 चौकारांनिशी 53 धावा करत संघाला विजयाच्या जवळ नेले. पण संघातील इतर फलंदाजांनी हाराकिरी केल्यामुळे साईनाथ स्पोर्ट्स क्लबला पराभव पत्करावा लागला. रिया साळुंखे, करुणा सकपाळने प्रत्येकी दोन विकेट्स मिळवल्या. दिशा चांडक, आयरा सामंत आणि जान्हवी निगडेने प्रत्येकी एक विकेट मिळवली. फलंदाजी, गोलंदाजीसह दोन झेल पकडून आयरा सामंतने सर्वोत्तम खेळाडूचा पुरस्कार मिळविला.
