दिनमान प्रतिनिधी
नवी मुंबई।
वाशी एपीएमसी बाजारात जानेवारी-फेब्रुवारीपासून नवीन लसणाची आवक होण्यास सुरुवात होते. बाजारात आता पूर्णपणे नवीन लसूण दाखल होत आहे. नवीन लसणाची आवक वाढली असल्याने लसणाचे दर उतरले आहेत. घाऊक बाजारात दर 80 ते 110 रुपयांवरून आता 50 ते 85 रुपयांवर आले आहेत.
एपीएमसी बाजारात जानेवारी-फेब्रुवारीमध्ये नवीन लसणाची आवक जादा आहे. त्यामुळे नवीन लसूण बाजारात दाखल होताच दर आवाक्यात येत असतात. चार वर्षांपूर्वी लसणाचे दर गगनाला भिडले होते. प्रतिकिलो 200 ते 250 रुपयांची मजल मारली होती. एपीएमसीत मध्य प्रदेश आणि गुजरातमधून लसणाची आवक होते. सध्या मध्य प्रदेशातून 14 गाड्या लसूण दाखल होत आहे. यामध्ये दोन प्रकारच्या लसणाचा समावेश आहे. एक देशी लसूण आणि दुसरा उटी लसूण. यामध्ये उटी अधिक दराने विक्री होत असून प्रतिकिलो 40-85, तर देशी लसूण 30-50 रुपयांनी विक्री होत आहे. नवीन लसणाची आवक चांगली होत असल्याने दरात घसरण झाल्याचे मत व्यापार्‍यांनी व्यक्त केले आहे.
