दिनमान प्रतिनिधी
उल्हासनगर|
कॅम्प नं-१, शहाड परिसरात सफाईच्या कामावरून चौकडीने नुकतेच पहाटे ४ वाजता दोघांवर लोखंडी रॉडने हल्ला करून गंभीर जखमी केले. जखमींपैकी सुनील निकम मुंबई येथील रुग्णालयात मृत्यूशी झुंज देत असून उल्हासनगरपोलिसांनी भोला कनोजिया व चिंटू चंडालिया यांना अटक केली. उल्हासनगर कॅम्प नं-१ शहाड परिसरात सफाई कामाच्या वादातून सोमवारी पहाटे ४ वाजता नितीन कनोजिया, भोला कनोजिया, चिंटू चंडालीया व एका सहकार्‍याने सोनू शर्मा व सुनील निकम यांच्या डोक्यावर लोखंडी रॉडने हल्ला केला. या हल्ल्यात दोघेही गंभीर जखमी झाले. उल्हासनगर पोलिसांनी दोघांनाही मध्यवर्ती रुग्णालयात उपचारासाठी दाखल केले. सुनील निकम यांची तब्येत खालावल्याने, त्याला मुंबई येथे हलविण्यात आले. तेथे सुनील मृत्यूशी झुंज देत आहे.
याप्रकरणी उल्हासनगर पोलिस ठाण्यात नितीन कनोजिया, भोलू कनोजिया, चिंटू चंडालिया व एका अल्पवयीन मुलावर गुन्हा दाखल केला असून चिंटू व भोला यांना पोलिसांनी अटक केली. भोला कनोजिया हा गुंड असून गेल्याच महिन्यात त्याची तडीपारीची शिक्षा संपल्याची माहिती वरिष्ठ पोलिस निरीक्षक दिलीप फुलपगारे यांनी दिली आहे.
