दिनमान प्रतिनिधी
मिरा रोड|
मीरा रोड येथे राहणार्‍या सरस्वती वैद्य या तरुणीची तिच्या दुप्पट वयाच्या असलेल्या लिव्ह इन पार्टनर मनोज साने याने निर्घृण हत्या केल्याचे प्रकरण समोर आल्यामुळे संपूर्ण देशात खळबळ उडाली आहे. या प्रकरणात विकृतीचा कळस गाठणारा मनोज साने हा वारंवार तपासात पोलिसांची दिशाभूल करण्याचा प्रयत्न करत आहे. त्यामुळे हत्याचे पुरावे गोळा करण्याचे मोठे आव्हान पोलिसांपुढे उभे राहिले आहे. मात्र या दरम्यान मनोजला त्याने केलेल्या विकृत कृत्याचा कसलाच पश्चाताप झालेला नाही. तो सतत शांत राहून केवळ पोलिसांनी विचारलेल्या प्रश्नांची फिरवून फिरवून उत्तरे देत असल्याची माहिती पोलिसांकडून देण्यात आली.
सरस्वती ही आश्रमामध्ये असताना दहावीच्या परीक्षेत दोन विषयांत अनुत्तीर्ण झाली होती. यामुळे तिने निराश होऊन त्यावेळी शिक्षण सोडून दिले होते. मात्र मनोज साने यांच्यासोबत राहत असताना तिच्या मनात पुन्हा शिक्षण पूर्ण करण्याची इच्छा निर्माण झाली होती. म्हणून २०१९ रोजी तिने आश्रममध्ये जाऊन आपले प्रमाणपत्र व इतर कागदपत्रे जमा केली होती.
सरस्वतीला शिक्षण पूर्ण करण्यासाठी आपणच प्रवृत्त केल्याचा दावा मनोजने केला आहे. यासाठी राहत्या खोलीत त्याने काळा फलक बसून घेतला होता व त्यावर विषयाची नावे लिहिली असल्याचे पोलिसांनादेखील दिसून आले आहे. मात्र आजपर्यंत सरस्वतीने दहावीची परीक्षा देण्यासाठी प्रवेश घेतल्याचा कोणताही पुरावा मिळू शकलेला नाही. शिवाय काळ्या फलकावर लिहिण्यात आलेल्या विषयांच्या नावात पोलिसांना संशय असल्यामुळे हत्येचे गूढ वाढत असल्याचे मत पोलिसांकडून व्यक्त केले जात आहे.
सरस्वती व आपण अनाथ असल्याचा दावा सुरुवातीला आरोपी मनोज सानेने पोलिसांकडे केला होता. परंतु हत्येची बातमी प्रसिद्ध झाल्यानंतर सरस्वतीच्या तीन बहिणींनी पोलिसांना संपर्क साधला आहे. यामुळे आपल्या कुटुंबीयांशी संपर्क साधू नका अशी विनवणी मनोजकडून पोलिसांकडे केली जात आहे. पोलिसांनी बोरिवलीला वास्तव्यास असलेल्या मनोजच्या कुटुंबीयांशी संपर्क साधला असून त्याच्या काका आणि भावाला जबाब नोंदवण्यासाठी शनिवारी नया नगर पोलिस ठाण्यात बोलावल्याची माहिती पोलिसांनी दिली आहे.
सरस्वतीवर सोमवारी अंत्यसंस्कार
सरस्वतीच्या बहिणींनी तिच्या शरीराचा ताबा देण्याची मागणी पोलिसांकडे केली आहे. त्यामुळे तिच्या बहिणीची सोमवारी डीएनए चाचणी करण्याचा निर्णय पोलिसांनी घेतला आहे. याचा अहवाल प्राप्त होताच त्यानंतर सरस्वतीच्या शरीरावर सोमवारी अंत्यसंस्कार होणार असल्याची माहिती पोलिसांकडून देण्यात आली.
