चंद्रमुखी’ 29 एप्रिलला

अभिनेत्री अमृता खानविलकरची मुख्य भूमिका असलेला ‘चंद्रमुखी’ हा चित्रपट मागच्या काही दिवसांपासून बराच चर्चेत आहे. या चित्रपटाची प्रेक्षक आतुरतेनं वाट पाहताना दिसत आहेत. एवढंच नाही तर आतापर्यंत प्रदर्शित झालेलं या चित्रपटाचं प्रत्येक गाणं प्रेक्षकांनी अक्षरशः डोक्यावर घेतलं आहे. चित्रपटाच्या ट्रेलरबाबत तर प्रेक्षकांमध्ये कमालीची उत्सुकता होती. अखेर या चित्रपटाचा ट्रेलर आता प्रदर्शित झाला असून त्याची सोशल मीडियावर जोरदार चर्चा होताना दिसत आहे. एक ध्येयधुरंदर विवाहित राजकारणी जो समाजात काही सकारात्मक बदल आणू पाहात आहे. तो मोहमयी सौंदर्य, घायाळ करणार्‍या अदा आणि बहारदार नृत्याने अनेकांना वेड लावणार्‍या सौंदर्यवतीच्या म्हणजेच ‘चंद्रा’च्या प्रेमात पडतो. तेव्हा त्याच्या राजकीय कारकिर्दीवर होणारा परिणाम आणि त्याच्या वैयक्तिक आयुष्यात येणारी वादळे आपल्याला ट्रेलरमध्ये दिसत आहेत. चंद्रा, दौलतराव आणि दमयंती यांच्या प्रेमाचा हा त्रिकोण पुढे कोणत्या वळणावर जाणार, याची उत्सुकता सगळ्यांनाच लागून राहिली आहे. चंद्रा आणि दौलतराव यांच्या हळुवार खुलत जाणार्‍या प्रेमकहाणीत दमयंतीच्या येण्याने नाट्यमय ट्विस्ट येणार की त्यांची प्रेमकहाणी अशीच अबाधित राहणार, याचे उत्तर आपल्याला 29 एप्रिल रोजी चित्रपटगृहात मिळणार आहे. ‘चंद्रमुखी’ हा चित्रपट लेखक विश्वास पाटील यांच्या ‘चंद्रमुखी’ या कांदबरीवर आधारित आहे. या चित्रपटाचे दिग्दर्शन प्रसाद ओक यांनी केले आहे.
– प्रतिनिधी