दिनमान प्रतिनिधी
अंबरनाथ|
अंबरनाथ पश्चिमेकडील वडोल गाव एमआयडीसी क्षेत्रात ब्लूजेट हेल्थ केअर लिमिटेड या रासायनिक कारखान्यामध्ये शनिवारी दुपारी ३.३० च्या सुमारास भीषण स्फोट झाला. या स्फोटानंतर कंपनीतून मोठ्या प्रमाणात विषारी वायूची गळती सुरू झाली आहे. स्फोटात कंपनीतील एक कामगार मृत्युमुखी पडला असून अन्य एक कामगार जखमी झाला.
शनिवारी दुपारी अंबरनाथच्या वडोलगाव एमआयडीसी क्षेत्रात एका कंपनीला भीषण स्फोट झाला. या कंपनीत एकूण पाच केमिकल प्लांट असून त्यापैकी दोन नंबरच्या प्लांटमध्ये हा भीषण स्फोट घडला. त्यानंतर या प्लांटमध्ये आगदेखील लागली होती. आग क्षणार्धात विझली असली तरी या स्फोटामुळे कंपनीत असलेल्या केमिकल टाक्यांना गळती लागली आहे. कंपनीत असलेला मोठ्या रासायनिक टँकमधून नायट्रिक अ‍ॅसिडची गळती सुरू झाल्याने परिसरातील नागरिकांना त्याचा त्रास जाणवत आहे.
अंबरनाथ अग्निशामक दल, एमआयडीसी अग्निशामक दल, आणि कंपनीतील कामगार एकत्रितपणे ही वायू गळती रोखण्याचा प्रयत्न करीत आहेत. दरम्यान, कंपनीत झालेल्या स्फोटात सूर्यकांत झिमान हा कामगार जागीच मृत्यूमुखी पडला असून, इतर चार कामगार गंभीर जखमी झाले आहेत. त्यांच्यावर उल्हासनगरच्या खासगी रुग्णालयात उपचार सुरू आहेत.
अंबरनाथ केमिकल कंपनी स्फोटातील इतर चार कामगारांची प्रकृती चिंताजनक आहे. स्फोटानंतर वणव्यासारख्या पसरलेल्या आगीमुळे दूरपर्यंत धुराचे लोट दिसत होते. विषारी वायू गळतीमुळे अग्निशमन दल जवानांना आगीवर नियंत्रण मिळवताना प्रचंड त्रास होत असल्याने मास्क लावावे लागले.
