दिनमान प्रतिनिधी
डोंबिवली।
बालदिनाचे औचित्य साधून डोंबिवली पूर्वेकडील आनंद बालभवन येथे चित्रकला क्लासेसतर्फे कलाविष्कार हे चित्रप्रदर्शन 18 व 19 नोव्हेंबर असे दोन दिवस सकाळी 10 ते रात्री 8 वाजेपर्यंत भरविण्यात आले आहे. या प्रदर्शनात 7 ते 14 वर्ष वयोगटातील मुलामुलींनी साकारलेली कलाकृती पाहण्यासाठी डोंबिवलीकरांनी गर्दी केली होती.
चिमुकल्यांच्या कलेला प्रोत्साहन मिळावे व डोंबिवली शहराचे नाव केवळ देशपातळीवरच नव्हे तर जागतिक स्तरावर उंचावण्याकरिता हे प्रदर्शन भरविल्याचे शिक्षिका श्रुती चौघुले यांनी सांगितले.
प्रदर्शनात पेन्सिल, कलर पेन्सिल चित्रे, वॉटरकलर चित्रे, 3 डी, एलिमेंटरी आणि इंटरमीडियट ग्रेड परीक्षांची चित्रे आहेत. मुलांमध्ये कलेची आवड निर्माण व्हावी, चित्रकार मुलांना प्रोत्साहन मिळावे, यासाठी जास्तीत जास्त कलाप्रेमींनी कलाविष्कार चित्रप्रदर्शनास भेट द्यावी, असे शिक्षिका चौघुले यांनी सांगितले.
या प्रदर्शनाच्या उद्घाटनप्रसंगी प्रमुख पाहुणे म्हणून शताब्दी पुरस्काराने सन्मानित उत्कृष्ट चित्रकार व मुख्याध्यापक श्रीधर केळकर आणि अनेक प्रसिद्ध चित्रकार, शिल्पकार तसेच अरुण कारेकर (रायगड जिल्हा), शिल्पकार सिद्धार्थ साठे (कल्याण), सुलेखनकार राम कस्तुरे (डोंबिवली) आदी उपस्थित होते.
