दिनमान प्रतिनिधी
कल्याण।
भेकराच्या पिल्लाची विक्री करणार्या तिघांना ठाणे वन विभागाने धडक कारवाईत अटक केली. रमेश तुकाराम वाळिंबे (रा. आल्यानी), बारकू गणपत हिलम (रा. कळगाव), गणेश गुरुनाथ वाघ (रा. कळगाव) अशी त्यांची नावे असून, हे तिघेही शहापूर तालुक्यात राहणार आहेत.
वन विभागाला मिळालेल्या गुप्त बातमीनुसार उपविभागीय वन अधिकारी मांडवीस्थित ठाणे सुनील नाईक यांच्या मार्गदर्शनाखाली एस. बी. देवरे वनक्षेत्रपाल पडघा यांच्या नेतृत्वाखाली ही कारवाई करण्यात आली. नाशिक-मुंबई महामार्गावर सर्व्हिस रोडजवळ मौजे कासने गाव हद्दीतील पॅरामाउंट हॉटेलाशेजारी भेकर जातीचे पिल्लू अवैध विक्री व्यवहार करताना या तिघांना रंगहाथ पकडण्यात आले. त्यांना भिवंडी न्यायालयात हजर केले असता दोन दिवसांची पोलिस कोठडी सुनावण्यात आली.
या कारवाईत वनपाल पडघा दिनेश माळी, वनपाल वडपा विलास निकम, वनपाल दिघाशी श्याम चतुरे, वनरक्षक सांगावं अजय राठोड, वनरक्षक पाच्छापूर अमित कुलकर्णी, वनरक्षक लोनाड जमीर इनामदार, कार्यालयीन लेखापाल पंकज भाऊसाहेब, महेंद्र भेरे कार्यालयीन कर्मचारी, वाहन चालक विकास उमतोल, संतोष गोडांबे, वनमजूर यांनी सहभाग घेतला. या कारवाईत आरोपींकडून दोन मोटारसायकलीही जप्त करण्यात आल्या आहेत.
