दिनमान प्रतिनिधी
डोंबिवली।
दारू विक्रेत्याजवळ चुगली केली म्हणून डोंबिवली जवळील सोनारपाडा गावातील दोघांनी याच गावातील एक रहिवाशाला रात्रीच्या वेळेत लाकडी बांबूने बेदम मारहाण करून ठार केले. त्याने आत्महत्या केली हे दाखविण्यासाठी इमारतीच्या मागील खिडकीतून मृताला बाहेर फेकल्याचा प्रकार उघडकीला आला आहे.
राजेश रामवृक्ष सहाने उर्फ केवट (38, रा. तिवारी टोला, भटन ददन,देवारिया, उत्तर प्रदेश) असे मृताचे नाव आहे. मृताला अतिशय क्रूर पध्दतीने ठार मारलेल्या आरोपींची नावे दादु मटु जाधव उर्फ पाटील (45, रा. साईशध्दा इमारत, गावदेवी मंदिरा समोर, सोनारपाडा, डोंबिवली पूर्व), विनोद पडवळ (सोनारपाडा) अशी आहेत.
मृत राजेश याने या भागातील एका दारू विक्रेत्याला हल्लेखोरांची चुगली केली होती. त्याचा राग आरोपींना आला होता. आरोपींनी मृत राजेश सहाने याला धडा शिकवण्याचा निर्णय घेतला. गुरुवारी मध्यरात्री सोनारपाडा येथील साईश्रद्धा इमारतीत आरोपींनी राजेशला बोलावून घेतले. तेथे त्याच्याशी तू दारू विक्रेत्याला आमची चुगली का केली, असा जाब विचारला. याविषयावरून त्याच्याशी वाद घालून त्याला लाकडी दांडक्याने खोलीमध्ये कोंडून मारहाण केली. आरोपी दादु पाटील, विनोद यांनी मृताच्या डोक्यात लाकडी दांडक्याने प्रहार केले. मृताने बचावासाठी खूप प्रयत्न केले. त्याला त्याने बाहेर पडण्याची संधी दिली नाही. या मारहाणीत राजेश केवटचा जागीच मृत्यू झाला.
राजेशच्या मृत्यूचा पुरावा नष्ट करण्यासाठी आरोपींनी त्याला इमारतीच्या दुसर्‍या मजल्यावरील खिडकीतून बाहेर फेकले. त्याने आत्महत्या केल्याचा बनाव रचला. इमारतीच्या खाली रक्त पडल्याने ते आरोपींनी पुसून काढले. सकाळी सहा वाजता साई श्रद्धा इमारतीच्या खाली एक जण जखमी अवस्थेत पडल्याचे रहिवाशांना दिसले. तात्काळ ही माहिती पोलिसांना देण्यात आली. साहाय्यक पोलीस निरीक्षक सुनील कुराडे, वरिष्ठ पोलिस निरीक्षक शेखर बागडे घटनास्थळी दाखल झाले. तपासणीत राजेशचा जागीच मृत्यू झाला होता. त्यांनी तात्काळ तपास सुरू काही वेळेतच दोन्ही आरोपींना अटक केली.
